Kultura proposamenen sormena bultzatzeko deialdia martxan jarri dute Getxon

Datorren urterako kultura-programazioa osatzeko proposamenak aurkezteko deialdia irekiko du Getxoko Udalak, Kultur Etxearen bitartez, abenduaren 1etik 2021eko urtarrilaren 10era. Horren helburua da getxoztarrek bultzatu edo eginiko proiektuak erakustea eta horiek egikaritzea ahalbidetzea.

Deialdia egoitza fiskala Getxon daukaten eta getxotarrek burutu, idatzi edo diseinatutako lan artistikoak ekoiztu, landu edo banatzen dituzten pertsona juridikoei zuzenduta dago. Ekimena askotariko proposamenetara zabalik dago, adibidez: antzerkia, dantza, zinea, musika, umorea, haurrentzako ikuskizunak…

Proposamen guztiak Muxikebarri zentroko aretoetan edo Romo Kultur Etxeko areto nagusian programatu ahal izateko diseinatuta egon behar dira eta Kultur Etxeko teknikoek hautatuko dituzte proiektu irabazleak. Aukeratutako proiektuak Getxoko Kultur Etxean zehazten duen agertokian erakutsiko dira 2021ean zehar, egoerak horrela ahalbidetzen badu.

Deialdi horri, gehienez, 100.000 euro esleituko zaizkio, osasun-egoera dela eta bertan behera geratu diren aurtengo herriko jaien baliabide ekonomikoak erabiliz. Ekimen horri buruzko informazio osoa www.getxo.eus/kulturadirulaguntzak estekan eskura dago.

Formakuntzarako laguntzak

Ekimen hori sormen kulturala bultzatu eta sektore artistikoari laguntzeko hiruko programa baten barnean dago eta aurretik abian jarri den sormen kulturalen diru-laguntzen deialdiari gehitzen zaiola. Multzo horren hirugarren deialdia laster zabalduko da eta formakuntza eta profesionalizazioa izango ditu ardatzak.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun