Gobela ibaian ehunaka arrain hil dituen isurketa baten berri eman zuen atzo Bizkaiko Basozainak elkarteak, sare sozialen bitartez. Ez dute zehaztu nor den horren erantzulea, ezta zer isuri duten ere. Hala ere, nabarmendu dute erreka horretan, barbo eta loinez gainera, EAEn oso urria den, eta babestuta dagoen, arrain hiruarantza ugari ere hil direla ur-kutsatze horren ondorioz.
Getxoko Udalak azaldu du oraindino ez dakitela zein den isurketa horren jatorria, eta jakinarazi du URAk ikerketa zabaldu duela horren harira, erakunde hori baita isurketak ikertzearen eta ibaien ardura duena.
Bitartean, Getxoko Auzokideok elkarteak susmagarri gisa jarri du Fadurako kiroldegia. Izan ere, deitoratu duenez, hildako arrainak Fadura ingurutik aurrera topatu dituzte, ustez, kloratutako ura isuri delakoan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
