Getxoko Kultur Etxeak abenduaren 19rako Muxikebarrin aurreikusita zegoen Izaroren kontzertua egokitu behar izan du, indarrean dagoen araudira egokitzeko. Hala, kultura barrutietako edukiera-murrizketa errespetatu ahal izateko, kontzertua saio bitan programatuko da, egun berean: 17:00etan eta 19:30ean. Orain arte saldutako sarrera denak itzuliko du Kultur Etxeak, eta ordutegi berrien saioetarakoak salmentan jarri, gaurtik aurrera.
Bertan behera utzitako kontzertuaren sarrera salmenta aurreko araudia indarrean zegoenean egin zen eta, araudi berria ezarri denean, azken horretan ezarritako edukiera-muga gainditu da. Beraz, araudi berrira egokitzeko, kontzertua bertan behera uztea erabaki da eta, horren ordez, bi saio programatu. Horiek horrela, saldutako sarrera guztien itzulketa egingo du Kultur Etxeak, eta ordutegi berrien saioetara joan gura dutenek berriro ere erosi beharko dituzte sarrerak; gaur bertan jarriko dira salgai ohiko saltokietan.
Online zein telefonoz eginiko salmentaren itzulketa automatikoki egingo da banku-transferentziaren bitartez. Txarteldegian edo Kultur Etxeetan saldutako sarreren (eskudiruz zein datafonoz) dirua eskatzeko Muxikebarriko txarteldegira joan beharko dute (10:30-13:00 / 17:30-19:30; astelehenetik barikura).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
