Begoñako galeriak berritzeko lanak 2021ean hasiko dira

Begoñako galerien balioa ezagutzera eman dute azken urteetan. © GETXOKO UDALA

Obrak egiteko funtsak milioi bat euro gainetik finkatu dituzte, Getxoko Udalak eta Espainiako Sustapen Ministerioak egingo dituzten ekarpenen bitartez. Urtebeteko atzerapenaren ondoren, egitura eta aurrealdea berrituko dituzte, jatorrizko itxurara bueltatzeko.

Lan horrekaz, batez ere Ereagako hondartzara begira dagoen aldean berritu gura dute, urteetako utzikeriagatok hondatutako eraikinari bere jatorrizko edertasuna itzultzeko asmoz. Horregaz batera, Loro izenaz ezaguna den landa-eremua ere berrituko dute.

Lan horiek egiteko funtsak 2020ko martxoan heldu behar ziren, Espainiako Gobernuak proiektuari onespena eman ostean, baina kudeaketa orain arte atzeratu da, eta lanakaz 2021eko lehen hiruhilekoan hastea aurreikusten dute. Horrela esan zuen atzo Alvaro Gonzalez Getxoko Kontratazio, Ondare eta Etxebizitzaren Arloko zinegotziak, El Correo egunkariari egindako adierazpenetan.

Eraikina berreskuratzen EHUko 60 ikerlarik baino gehiagok jardun dute, eraikinaren balio arkeologiko eta arkitektonikoa ezagutzera emateko. Orain eraikina jatorrizko itxurara bueltatuko da, XX. mende hasieran Ricardo Bastidak diseinatu zuen modukoa, hain zuzen ere.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun