Virginia Díaz arraunlaria eta Jon Ander Garrido futbolaria, Getxoko 2020ko kirolari onenak

Jon Ander Garrido eta Virginia Díaz, artxiboko irudietan. © GETXOKO UDALA

Virginia Díaz arraunlariak eta Jon Ander Garrido futbolariak jasoko dute bihar, martitzenean, Getxoko 2020ko kirolari onenen aipamenak. Covid-19ak eragindako pandemiaren ondorioek markatutako urtean, XIV. Getxo Sasoi Sasoian Sarien epaimahaiak, Getxo Kirolakeko teknikariek, kazetariek eta kirolaren eremuko adituek osatua, saridunen zerrenda argitaratu du; eta sariak banatuko dira Getxoko Udaletxeko osoko bilkuren aretoan. Edizio honetan ez da sorpresarik izango, Urteko Kirolari Onenaren saria ez ematea erabaki baita; gainera, sari-kopurua murriztu da, iaz lehiaketa ugari bertan behera geratu baitziren.

Raspas del Embarcadero Elkarteko arraunlaria den Virginia Díazek jasoko du emakumezko kirolari onenaren saria, aulki mugikorreko Espainiako txapelduna eta Europako txapeldunordea baita. 2013an ere, Getxoko kirolari onena izendatu zuten.

Jon Ander Garridori dagokionez, Getxo Kirol Klubean trebatutako futbolaria da, eta egun Cadizen jokatzen du; era horretan, gizonezko kirolari onenaren saria emango diote Cadiz taldeagaz Lehen Mailara igotzeagatik.

Sarien zerrenda honako hauek osatzen dute: Emakumezkoen promes onena saria, Naroa Ruiz patinatzailea, “Trophée du Bassin” nazioarteko proban bigarren postua eta Espainiako Txapelketan seigarrena lortu dituelako; Alain Flores atleta, gizonezkoen promes onena, 1.500 oztopoen Espainiako Txapelketa irabazi ondoren; Raspas del Embarcadero taldeko emakumezkoen senior taldea, Espainiako Arraunketa Olinpikoko Txapelketan, Estatuko talde onena izateagatik: urrezko bost domina eta brontzezko bat lortu zituen, eta horiei Espainiako Distantzia Luzeko Txapelketan irabazitako urrezko eta brontzezko bi dominak gehitzen zaizkie; Getxo Errugbiko gizonezkoen senior taldea, Ohorezko Mailara igotzeagatik; eta, azkenik, gizonezkoen junior talde onenaren saria, Raspas del Embarcadero klubak jasoko du, Espainiako Arraunketa Olinpikoko Txapelketan urrezko domina lortzeagatik.

Erlazionatuak

"Lan gogorra eginda, benetako ametsak lor daitezke"

Getxo

Raspas del Embarcadero Arraun Taldeko Virginia Diaz kirolari getxoztarrak 2020ko Tokioko Joko Olinpikoetan lehiatzeko txartela lortu du Ottensheim-...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun