Bizkaia Zubia plazako komun publikoak birgaitzeko lanak esleitu dira

© GETXOKO UDALA

Areetako Bizkaia Zubiaren plazako komun-publikoak birgaitzeko lanak esleitu ditu Getxoko Udalak, 143.000 euroko aurrekontuagaz. Beharrok 10 aste irautea espero da, udal-iturriek aurreratu dutenez.

Ekipamendu berrituak hiru komun izango ditu: bat aniztasun funtzionala duten pertsonentzat, beste bat emakumezkoentzat —gutxienez hiru komun eta bi konketa izango ditu— eta hirugarrena gizonezkoentzat —gutxienez bi komun, hiru pixatoki eta bi konketa izango dituena—. Gainera, gela bat egongo da garbitzeko tresnak gordetzeko.

Funtsean, instalazioa eta ur eta saneamendu harguneak berritu eta egokituko dira. Komun berriak jarriko dira eta atal elektrikoaren gainean lan egingo da, ekipamendu horren argiztapena hobetuz. Halaber, komunetako irisgarritasuna hobetuko da oztopo arkitektonikoak kenduz, mugikortasun murriztua duten pertsonen erabilera erosoa errazteko: kanpoko aldean, komunen aurrean dauden eskailera-mailak eta jardineraren zati bat kenduko dira (egungo sarbidea osatzen duten elementuak dira), eta bi arrapala jarriko dira. Hautazko ibilbide bat ere egongo da, hiru mailatako eskaileren bidez, gainerako erabiltzaileak ekipamenduaren albo batetik zuzenean sartzeko.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun