Bizkaibuseko geltokietan markesinak jartzeko eskatu du Getxoko PPk

Algortako Villamonte ingurua, artxiboko irudian.

Getxoko PPk mozio bat aurkeztu du, datorren osoko bilkuran eztabaidatzeko, non eskatzen duen markesinak jartzeko Bizkaibusi zerbitzua ematen dioten autobus-geltokietan. Hain zuzen ere, hurrengo hauetan: Algortako Villamonte eta San Martinen, eta Areetako Nagusia kalean.

Eduardo Andrade Getxoko PPko bozeramaileak azaldu duenez, "Getxon autobus geltoki ugari ditugu, pertsonen hiriarteko eta hiriko garraioari zerbitzua ematen diotenak. Geltoki horietako askok ez dute markesinarik, eta horrek kalte eta deserosotasuna eragiten die herritarrei klimatologia txarra denean, edo adinekoen kasuan, edo mugitzeko arazoak dituztenen kasuan, autobusaren zain zutik egotera behartuta ".

Andradek adierazi duenez, nahiz eta Bizkaibuseko zerbitzuetarako geltokien antolaketa eta mantenua Foru Aldundiaren menpe egon, ez da ahaztu behar udal-administrazioa dela herritarrengandik gertuen dagoena, eta, beraz, hura dela eskaeren berri duen lehena eta beharrei behar bezala erantzun behar diena.

Kontuak horrela, PPk proposatu du markesinak jartzea Bizkaibuseko hurrengo geralekuetan:

  • Villamonte (Algorta): bizilagunakaz akordio batera iritsi behar den tokia, eremu hori pribatua baita, baina erabilera publikokoa.
  • San Martin (Algorta): berrikuntzak egin berri dituzte, eta ez dute markesinarik jarri, "horretarako nahikoa leku egon arren".
  • Kale Nagusia (Areeta): erabiltzaileei zerbitzua emango dien markesina bat instalatzeko "nahikoa leku" du.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun