Alangoko gasolindegian kultur aretoa sortzea proposatu du Getxoko EH Bilduk

© GETXOKO EH BILDU

Algortako Alango inguruan dagoen gasolindegi zaharrean kultur areto berri bat sortzeko proiektua aurkeztu du Getxoko EH Bilduk. Taldeak gogoratu duenez, azpiegitura horrek urteak daramatza inolako erabilerarik gabe, eta deitoratu du Udalak hori bota eta etxebizitzak eraiki ditzakeela bertan. Proposamena otsaileko osoko bilkuran eztabaidatu eta bozkatuko da.

EH Bilduk ohar batean azaltzen duenez, Alangoko gasolindegia leku "egokia" izan zitekeen udalerriko artistentzat gune berri bat sortzeko, "are gehiago Udalak Torrene erakusketa-gela itxi zuenetik, bestelako inolako alternatibarik eskaini gabe". Koalizio abertzaleak deskribatu duenez, proiektu horretan gasolindegiko estetika mantenduko litzateke, eta, bertan, taberna, terraza, erakusketa-gela eta harmailak egokituko lirateke. "Kultur ekitaldiak antolatzeko aukera egongo litzateke: hitzaldiak, erakusketak, kontzertu akustikoak, proiekzioak...", iragarri du EH Bilduk.

Oharrean azpimarratuta dagoenez, gune hori, Udalak bultzatuko balu ere, ideia da udalerriko artistek eurek kudeatzea, "modu autogestionatuan", bertan sortuko litzatekeen tabernaren bitartez. "Horretarako, prozesu parte-hartzailea abiatuko litzateke artistekin batera, eta baita inguruko auzokideekin ere, Alangoko beharrak ezagutu eta ahal den neurrian proiektuan integratzeko".

Halaber, Algortako etorbidean ere eraberritze-lanak egitea proposatu du EH Bilduk; norabide bakarra ezarriz, trafikoa lausotuz eta oinezko eta bizikletentzako guneak irabazita. "Horrela, Algorta erdigunean topaleku berri bat sortuko litzateke".

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun