Getxoko Udaleko Gazteria Zerbitzuak martxotik uztailera bitartean udalerrian eskainiko diren jarduera, ikastaro eta tailerretan izena emateko epea ireki du. Jardueren eskaintza 11 ikastaro eta tailerrek osatzen dute, 11 eta 30 urte bitarteko gazteentzat. 4 tailer gaztelaniaz eskainiko dira eta 7 euskaraz, baina euskara erabat menperatzen ez duten gazteak ere parte hartzera animatu ditu Gazteria Zerbitzuak, bakoitzak bere mailan euskararen erabilera sustatzeko: "Jarduerak nagusiki praktikoak direnez, hizkuntza ez da komunikaziorako oztopo izango".
Aurretik ere eskaini diren jardueragaz batera (elektrizitatea, elikagaien manipulazioa, robotika, etab.), jarduera berriak ere eskainiko dira, hala nola etxebizitza-tailerra edo joskintza jasangarria. Josteko tailerra Wanted programako parte-hartzaile izan diren María Merello Bayok eta Andrea Monrocle Garciak emango dute.
Izen-ematea telefonoz (944 660 353) edo posta elektronikoz (gaztebulegoa@getxo.eus) egin daiteke, izena eta ikastaroa edo tailerra adieraziz, harremanetarako telefono bategaz batera (ahal dela, mugikorra). Internet bidez ( www.getxo.eus/gazteria) eta Gazte Informazio Bulegoan (Tangora etxea, Algortako hiribidea, 98) ere egin daiteke.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
