Planetaren Ordua

Ordubetez udalerriko hainbat argi amatatuko ditu Getxoko Udalak zapatuan ingurumenaren alde egiteko

Zapatuan, hilaren 27an, Planetaren Ordua ospatuko da mundu osoan; kontuak hala, aurten ere, Getxoko Udalak parte hartuko du ingurumenaren aldeko ekimen horretan, "naturaren defentsarekin duen konpromisoa frogatzeko", udal-iturrien azaldu dutenez.

Naturaren aldeko Mundu Fondoak (WWF) sustatutako ekimena da Planetaren Ordua, eta urteakaz inoizko ingurumen arloko mobilizazio-kanpainarik handiena bihurtu da klima-aldaketaren aurkako borrokan. Espainiar Estatu osoan, ehunka udal, enpresa eta erakundeen laguntza du.

Aurrekoetan bezala, Udalak Andrés Isasi Musika Eskolako argiak, Areetako eta Arrigunagako hondartzetako paisaia-luminariak, Evaristo Churruca kaiko argi apaingarriak eta Portu Zaharreko zelaigunekoak amatatuko ditu ordubetez, zapatuan, 20:30etik 21:30era.

Era berean, Udalak konpromisoa hartu du ekimena herritarren artean zabaltzeko sare sozialen eta hedabideen bitartez; eta kanpainaren bultzatzaileek energia aurrezteko proposatutako energia-eraginkortasunerako zenbait neurri hartzeko: hiritarrei gonbita luzatzen zaie beren etxeetan gutxienez astean behin energia aurrezteko, erabilera bakarreko plastikoak ez erabiltzeko eta garraiobide publikoan bidaiatzeko.

Kanpainan parte hartzeko, eman ezazu izena hemen: www.horadelplaneta.es.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun