COVID-19aren ondorioei epe labur eta ertain-luzean aurre egiteko 13,1 milioi euro bideratuko ditu Getxoko Udalak

Ekimenaren berri eman dute gaur, eguaztenean, Algortako Muxikebarri Antzokian. © GETXOKO UDALA

Amaia Agirre Getxoko alkateak eta Udalean ordezkaritza duten alderdi politiko guztiek (EAJ, PP, EH Bildu, PSE-EE eta Elkarrekin Podemos) Getxo Ekinez 2021 ekintzen programa sinatu dute gaur, epe labur eta ertainean COVID-19aren ondorio sozioekonomikoei aurre egiteko plana, 13 milioi euro baino gehiago inbertituko dituena.

Programak 80 ekintza biltzen ditu, eta, batez ere, arlo hauetan izango du eragina: Gizarte-Kohesioa, Ekonomia-Sustapena, Kultura, Kirola, Ogasuna eta Osasuna. Udal-iturriek azpimarratu dutenez, ia bikoiztu egin da aurrekontua (% 90eko igoera, hasierakoaren aldean) ekintza horiei aurre egiteko.

Getxo Ekinez 2021 ekimenean jasotako jarduerak antzemandako larrialdiaren arabera egingo dira. Presazko 56 ekintza definitu dira (9.507.600 euro) eta 24 epe ertain-luzera (3.592.400 euro). Arloz arlo, Gizarte Kohesioaren Arloak 34 neurri garatuko ditu (6.492.000 euro), Sustapen Ekonomikoak 27 (4.917.700 euro), Kulturak 9 (1.038.800 euro), Kirolak 3 (136.000 euro), Ogasunak 5 (285.500 euro) eta Osasunak 2 (230.000 euro).

Oro har, dokumentuan proposatutako neurri guztiak Udalbatzak ezarritako helburuak lortzeko behar den aurrekontuaz hornitzeko hartutako konpromisoaren babesean daude, bereziki, egoera sozial eta ekonomikoan dauden getxotarrentzako laguntzetan. Konpromisoa heltzen da aurkezten diren eskaera guztietara, baldin eta laguntza horiek jasotzeko behar diren baldintzak betetzen badituzte.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun