Atxilotu bat, ostalaritza-establezimendu baten itxiera itxi, txoko bat zigilatu eta 279 zigor-proposamen; aste-akabuko balantzea

Getxoko Udaltzaingoak 276 zigor-proposamen egin ditu joan den aste-akabuan, indarrean dagoen osasun-araudia urratzeagatik: lau pertsonatik gorako taldeetan egotea (79), maskara ez eramatea (71), edari alkoholdunak bide publikoan kontsumitzea (53) eta pertsonen zirkulaziorako gaueko ordutegia ez errespetatzea (49). Gainera, pertsona bat atxilotu dute identifikatzeari uko egiteagatik, ostalaritza-establezimendu bat itxi dute baimendutako edukiera gainditzeagatik eta txoko pribatu bat jai bat ospatzeagatik. Domekan, eguraldi ona zela eta, Ereagako hondartzarako sarbideak ordu eta erdiz itxi behar izan zituzten, bertara joan ziren ibilgailuek eragindako kolapsoa zela eta.

Aste-akabuan egindako jarduketen artean, udal-iturriek nabarmendu dute bariku gauean pertsona bat atxilotu izana; patruila batek bera eta beste zazpi pertsona aurkitu zituen Algortako Telletxe plazan, baimendutako gaueko ordutegitik kanpo, 23:15ean. Bertan zeuden pertsona gehienek euren identifikazioa onartu zuten. Atxilotuak, berriz, uko egin zion behin baino gehiagotan; beraz, atxilotu zuten desobedientzia larria eta agintaritzaren agenteei aurre egitea egotzita.

Zapatuan, hilaren 27an, 19:30ean, Udaltzaingoak bezeroak atera behar izan zituen ostalaritza-lokal batetik, baimendutako edukiera gainditzen zuelako eta titularrak betetzen ez zuelako egungo osasun-araudiak behartzen duen "in vigilando" lana. Halaber, gau horretako goizaldean, 01:00etan, 13 pertsona salatu zituzten, txoko pribatu batean festa bat ospatzen ari zirelako. Dagozkion zehapen-aktak egin ondoren, jaia amaitutzat eman zen.

Berehala Aste Santuko oporrak helduko direla eta, Udalak berriro eskatu du erantzukizun indibidualeko eta kolektiboko jarrerak izatea, eta gogorarazi du, beste behin ere, ezarritako oinarrizko babes-neurri sanitarioak bete egin behar direla: maskara nahitaez erabiltzea, eskuak maiz garbitzea, pertsonen arteko segurtasun-tartea mantentzea, gaueko ordutegian pertsonen zirkulazio-askatasunaren muga errespetatzea (22:00etatik 06:00etara) eta burbuila soziala babestea (4 pertsona gehienez), besteak beste.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun