Algortako Manuel Gainza aparkalekuan egoiliarrentzako izango diren plazak zozkatuko dituzte eguenean, apirilaren 15ean, 12:00etatik aurrera. Guztira, udal-iturriek zehaztu dutenez, 111 eskaera aurkeztu dira 86 lekurako. Hiru eskabide mugikortasun urriko pertsonentzat gordetako hiru plazei dagozkie, eta, beraz, bermatuta izango dute esleipena.
Osasun arrazoiengatik, pandemia dela eta, zozketa ateak itxita egingo da, baina Udalak zozketa horren jarraipena streaming bidez zuzenean egiteko aukera eskainiko du Youtuben. Halaber, emanaldia amaitutakoan, zozketaren bideoa grabatuta ikusi ahal izango dute interesdunek kanal horretan bertan.
Esleipendunen behin betiko zerrenda eta zozketan esleitu zaien partzelaren zenbakia udaletxeko iragarki-oholean eta Udalaren webgunean argitaratuko dira, hemen.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
