Andra Mariko kiroldegiaren ondoko gunean ur-parke bat sortzea proposatu du Getxoko PPk. Horretarako, gaia eztabaidatzeko mozioa aurkeztuko du datorren osoko bilkuran. "Gure proposamena da kiroldegietatik gertu dagoen eremu edo parke zabal batean uretako jolasak dituen gunea sortzea, hala nola txirristak, kanoiak, kanpaiak edota lurretik ateratzen diren txorrotak izango lituzkeena, umeek eta gazteek horiekin entretenitu ahal izateko", zehaztu du Eduardo Andrade bozeramaile popularrak.
Popularrek azaldu dutenez, euren proposamena da irudimena, trebetasuna eta motrizitatea sustatzen dituzten hainbat ur-joko instalatzea, "betiere erabiltzen den ur guztia berreskuratzeko sistemarekin". PPkoek diotenez, instalazio horregaz, "azpiegitura handien beharrik gabe", familientzako aisialdirako beste gune bat sortuko litzateke, eta, horrela, "Fadurako instalazio saturatuak arintzen lagundu ahal izango dugu", adierazi du Andradek.
Alderdi popularrarentzat, ur-parke hori kokatzeko lekurik aproposena litzateke Andra Mari kiroldegiaren ondoko gunea; leku horretan gainera, etorkizunean, igerileku bat egon beharko litzatekeela gaineratu dute PPkoek. "Andra Mari kiroldegiaren ondoko gune hori oso kokaleku egokia izango litzatekeela uste dugu, baina ez dugu baztertu nahi Portu Zaharreko zabalgunea bezalako beste kokapen batzuk", esan du Andradek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
