Getxo Klima Aldaketara Egokitzeko Plana izango du Udalak urte honen amaierarako

Gobela ibaia, gainezka, uholdeen artxiboko irudian.

Getxo Klima Aldaketara Egokitzeko Plana idazteko zerbitzua esleitu du Udalak, 25.276 eurotan. Hori idazteko lanen iraupena zazpi hilabetekoa izango dela aurreikusi dute udal-arduradunek. Besteak beste, aztertuko dituzten mehatxu-klimatikoak euriteek eta kostaldeko fenomenoek eragindako uholdeak, bero-boladak eta lehorteak izango dira.

Hiri Ingurumen Zerbitzuetako eta Ingurumen Kalitateko zinegotzi Joseba Arregik azaldu duenez, plan horrek beharrezko informazioa eta tresnak emango dizkio Udalari, "udalerria klima-aldaketarekiko erresilienteagoa eta jasangarriagoa izan dadin, hau da, klima-aldaketaren ondoriozko fenomenoen aurrean oreka berreskuratzeko gaitasun handiagoa izan dezan". Horretarako, urrakortasunaren eta arrisku klimatikoaren diagnostikoa egingo dela azpimarratu du, bai eta Ekintza-Plan bat ere, "gure udalerrian ezarri beharreko epe labur, ertain eta luzerako neurriak jasoko dituena, inplikatutako eragile nagusien parte-hartzearekin”.

Aztertuko diren mehatxu klimatikoak euriteek eta kostaldeko fenomenoek eragindako uholdeak, bero-boladak eta lehorteak izango dira. Eta arrisku klimatikoaren estimazioaren kalkulua haiekiko dagoen esposizioaren, testuinguruaren sentikortasunaren eta egokitzeko gaitasunaren arabera egingo da.

Horren ondoren, lehentasunezko ekintza-neurriakaz egokitzeko estrategia egingo da, balorazio ekonomikoagaz, jarraipen-adierazleakaz eta planean dauden beste batzuekaz koordinatzeko mekanismoakaz batera.

Parte hartzeko prozesuak, bai barnekoak (udaleko teknikarien eta politikarien artekoa), bai kanpokoak (funtsezko eragileekin: udalerriko gizarte-sarea, elkarte sektorialak, ezagutzaren kudeatzaileak, etab.), hiru tailer bilduko ditu.

Planaren azken dokumentutik gehienez bost orriko laburpen bat aterako da, hizkera ez-konplexuan, ulergarria izan dadin, eta herritarrei komunikazio-jarduerak egiteko materiala ere jasoko da.

Arduradunek azaldu dutenez, Egokitzeko Plana bat etorriko da Europako Itun Berdeagaz eta KLIMA 2050 Euskadiko Klima Aldaketaren Estrategiagaz.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun