Proiektuak 5.000 metro koadro baino gehiago irabaziko dizkio ibilgailuari mugikortasun iraunkorraren alde, eta 1.300 metro koadro baino gehiago galtzadari, aisialdirako eta pertsonen gozamenerako guneen alde; 34.000 metro koadro baino gehiagoko azaleran egingo dira lanak, eta zortzi jarduketa nagusi planteatzen dira hiri-bilbean ia 2 km bide integratzeko:
- Andrés Isasi Musika Eskolaren aurrealdea. Oinezkoentzako eta egoteko gune berri bat ere sortuko da, eta Barria kalearen eta Areeta etorbidearen arteko bidegurutzea berrantolatuko da. Bidegorriak jarraituko du Bizkaia Zubia plazaraino, Tomas Olabarri kaiko bidegorriarekin bat egiteko.
- Ama Mesedeetako elizaren aurrealdea. Herritarren egonaldi eta gozamenerako gune irisgarri berriak planteatzen dira, bidegurutzean Bizkaibus ezkerrera biratzea ahalbidetuz, eta bidegorriak jarraitzen du.
- Andrés Larrazabal eta Areeta etorbideko bidegurutzea. Bidegurutzea berrantolatuko da biribilgune bategaz; autobus-geltokiak, espaloiak eta bidegorri eremuak bereiziko dira, eta bidegorria Areeta etorbidean ere jarriko da.
- Pinar kalerako sarbidea, biribilgune eta espaloi irisgarri banagaz, TAO aparkaleku arautua izango duena Zugatzarte etorbidean, Zugatzarte etorbideko bidegorriaz gain.
- Lertegiko bidegurutzea. Lertegiko bidegurutzea berrantolatuko da, eta biribilgune bat eta bidegorria jarri dira Zugatzarte etorbidetik, eta autobus-geltokiaren irisgarritasuna eta segurtasuna hobetuko da.
- La Avanzada errepideko bidegurutzea. Biribilgune bat sortuko da; jarraitutasun segurua emango zaio Zugatzarterako bidegorri-sareari, eta Avanzadako bidegorriagaz lotuko da.
- Arriluze-Ereagako zuzengunerako sarbidea, bidegurutzearen berrantolaketa berri bategaz, biribilgune bat eraikiz. Bidegorri-sareari jarraitutasun segurua ematen zaio Zugatzarte etorbiderantz, eta Areetako Kaia–Ereaga–Portu Zaharreko bidegorriagaz lotuko da. Horrez gain, Avanzadatik gaur egun hurbilen dagoen Bizkaibuseko autobus-geralekua birkokatuko da.
- Dario Regoyos biribilgunea (Neguriko gasolindegi zaharra). Bertan, bidegorria luzatuko da, Leioa hiribideagaz etorkizunean lotzeko. Autobus-geltokiak, espaloiak eta bidegorria bereiziko dira.
Amaia Agirre alkateak azpimarratu duenez, “udal gobernua aurrera doa Legegintzaldiko Plan honetan hartutako konpromiso nagusietako batean: Getxo mugikortasun jasangarriaren erreferente izatea. Mugikortasun pertsonaleko ibilgailuen eta ibilgailu motordunen arteko bizikidetza ahalbidetzeko 30 km/h-ko gehieneko abiadura duten eremuak handitu ondoren, orain Bizkaia Zubiaren plazatik Neguriko gasolindegi zaharrera doan eremu baten hiri-eraldaketari ekingo diogu, Zugatzarte etorbide osotik – Getxoko birika berdeetako bat – igarota eta hiriko eta La Avanzadako sarbideak hobetuta. Hori guztia, ibilgailuen trafikoa motelduz eta, beraz, segurtasuna areagotuz eta kutsadura akustikoa gutxituz. Helburua oinezkoari eta bizikleta erabiltzeari lehentasuna ematea da, aisialdi- edo garraio-inguruneetan, bidegorrien sarearen bidez hiriko hainbat puntu lotzen baitira”.
Proiektuak bat egiten du Getxoko Hiri Mugikortasun Iraunkorreko Planaren helburuagaz, udalerri osasungarriagoa, jasangarriagoa eta seguruagoa izan dadin. Janire Ociok azaldu duenez, “hiri-egituraren baldintza fisikoak optimizatzearen aldeko apustua da, baina, batez ere, ingurumen-jasangarritasuna bultzatzearen eta pertsonen bizi-kalitatea hobetzearen aldekoa, ingurune naturalak (esaterako, Zugatzarte pasealeku osoko berdegunea) errespetatzen dituzten hiri-eremuak lortzeko neurrien bidez. Jarduera nagusienetakoak dira: herritarrak egoteko eta gozatzeko bi gune prestatuko dira, Areetako Andrés Isasi Musika Eskolaren aurrean eta Ama Mesedeetako elizaren aurrean; zirkulazioa berrantolatuko da eta lasaituko da hainbat bidegurutzetan, biribilguneak sortuz: Avanzadan eta Arriluze-Ereagarako zuzengunean, Lertegi kalean, Andrés Larrazabal eta Areeta etorbidearen elkargunean, eta Pinar eta Club kaleetako sarbidean; joan-etorriko bidegorrien sareari jarraipena emango zaio trazatu osoan, kasu batzuetan beste bidegorri batzuekin konektatuz eta etorkizuneko loturekin lotzeko aukera emanez; espaloiak zabalduko dira, autobus-geltokiak bereiziko dira, eta herriko argien eraginkortasun energetikoa hobetuko da led argiekin, kontsumoan % 45 aurreztuz”.
Erakusketak, erakusketen datak eta herritarren ekarpenak
Erakusketan hiru etorbideetako jarduketak ikus daitezke. Areeta etorbidea eta Algorta etorbidearen zatia, proiektua egituratzen duen Zugatzarte etorbideak lotuta. Historia pixka bat eginez, Zugatzarte etorbidea Areetako hondartzako hareatzek estalitako ingurune bat izan zen, kaia eraiki zen arte. Kaia izan zen ingurua txukuntzea eta zuhaitzak landatzea ahalbidetu zuena, Zugatzarte izenarekin bataiatzeko (‘zugatz-zuhaitz’ eta ‘arte’ atzizkiaz osatutako nomenklatura). Harrigarria bada ere, 1938an abere-larre zen. 1941ean, Avenida el Triunfo (Garaipenaren Etorbidea) izena jarri zioten, demokraziaren itzulerarekin Zugatzarte izena berrofizialdu zen arte.
Proiektuari buruzko erakusketak hiru agertokitatik igaroko dira, eta herritarren ekarpenei irekita dago:
- Bizkaia Zubia: maiatzaren 10etik 18ra.
- Kaiko Pasealekua (La Bola hondartza): maiatzaren 18tik 25era.
- Areetako Xake plaza: maiatzaren 25etik 31ra.
Proposamenerako ekarpenak aurkezteko epea irekita egongo da egun horietan, eta honela egin ahal izango da:
- Online formularioaren bidez, web-helbide honetan: https://www.getxo.eus/eu/gobierno-abierta/participacion/etorbideak
- Erakusketen ondoko postontzian, adierazitako egun eta lekuetan, izena, bi abizen eta NANa jasota, edo, bestela, aste honetan banatuko den Getxoberrin proposamen honen gainean banatuko den gehigarri bereziaren ebakinaren bidez.