2017an apurtu zen

Gaur abiatu dituzte Getxoko udaletxeko balaustrada zaharberritzeko lanak

Apurtu zenetik, balaustrada hesituta egon da.

Getxoko udaletxea inguratzen duen balaustrada osoa eta eskailerak berreraikitzeko lanak hasi dira gaur, astelehenean. Gainera, eraikinera sartzeko plataformaren azpiko lokalen irisgarritasuna, segurtasuna eta bizigarritasuna hobetzeko beste lan batzuk egingo dira. Obrak egiteko epea 14 astekoa da, eta aurrekontua 191.708 eurokoa (BEZa barne).

Lau urte igaro dira Getxoko udaletxearen aurreko zabalgunea babesteko baranda metalikoetako bat apurtu eta, goitik behera erorita, hiru ikasle zauritu zirenetik. Ordutik, hesituta egon da balaustrada apurtuta duen gunea, eta hura guztiz berreraikitzeari ekingo dio Udalak orain.

Udal-iturriek zehaztu dutenez, udaletxeko balaustrada osorik berreraikitzeko lanak 1925ean datatutako jatorrizko proiektuaren diseinuari jarraituz egingo dira, "estilo neoklasikoko eraikinaren eta bere inguruaren estetika eta estilo arkitektonikoa gehien errespetatzen dituen aukera baita". Berreraikitzeko proposamena, jatorrizko proiektuarekiko ahalik eta fidagarriena, ondarearen ikerketan eta aldez aurreko azterketa historikoan oinarritzen da. Azterketa horiek udal Liburutegien eta Artxiboaren funtsakaz eta lankidetzagaz egin dira, balaustradak urteetan zehar jasan ahal izan dituen konponketak eta eraldaketak zehazteko. 

Horregaz batera, kanpoko hormaren goiko basamentua edo errematea sendotuko da, perimetroko errematearen estankotasuna bermatuko da eta plataformaren alboko pasabideen zabalera handituko da, irisgarriagoak izan daitezen.

Lanak udal-eraikina kontserbatzeko jarduketa-planaren barruan daude, eta horretan sartzen dira, halaber, eraikineko errementaritza eta forja-elementuak zaharberritzeko obrak; lan horiek esleitzeko beharrezkoak diren izapide eta txostenak prestatzen ari dira, lizitaziora bi enpresa aurkeztu ondoren.

Erlazionatuak

Hiru gazte zauritu dira Getxon, 3,5 metroko altueratik erorita

Getxo

Azkorri ikastetxeko DBHko hiru ikasle zauritu dira gaur, 11:15ak aldera, Getxoko udaletxearen aurreko zabalgunea babesteko baranda metaliko bat apu...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun