Doinua: Semaforoak gorri ta berde
Eguzki izpiek azala jartzen
dutenean gori-gori,
itsaso urdinak freskotasuna
ematen dio askori.
Aisialdiko amets den giro
gozoko ur eder hori
derrigorrezko ibilbidean
begitantzen zaigu lodi,
eta azpiko barrunbe hotza
bilakatzen da hilobi.
Iparra mapan goian da eta
hegoa ikusten da behean.
Bien arteko harresia den
Mediterraneo aldean
milaka lagun dabiltza Europa
zaharra jotzeko oldean.
Baina osin beltz ilun horretan,
modu latz bidegabean,
amets ederrak amiltzen dira
modu anker eta ahalgean.
Zenbait alditan Europa zaharra
ari gara gu goresten,
eta ideia oker horretan
hamaika gaztetxo hezten.
Gizalegean itxuraz lehena
erraz bihurtzen da azken.
Ohar gaitezen gure ur garbiek
zenbat orban lohi dituzten,
lore ederrok azpiko kaka
ez dute ikusten uzten.