Aurreko ekainaren 24 eta 25ean, Torredenbarran (Katalunian) jokatu den Patinaje Artistikoko Espainiako Txapelketan bigarren postua eskuratu zuen Naroa Ruiz Monge getxoztarrak, Solo Dance modalitatean, gaztetako kategorian. Lehen aldia da euskaldun batek podiuma eskuratzen duena Patinaje Artistikoko Espainiako Txapelketan, Solo Dance modalitatean.
Zilar horregaz, 16 urteko gazteari hainbat ate ireki zaizkio patinajeko txapelketetan parte hartzeko, eta, besteak beste, hurrengo asteetan Alemaniako Kopara joango da Espainiako Federazioagaz, eta, ondoren, Portugalen Europako Kopan parte hartuko du.
Txapelketa 24an hasi zen derrigorrezko Cha Cha eta Tango saioakaz, eta, barikuan, dantza librea egin zuten. Horien emaitzak eman zituztenean gertatu zen ezustekoa: "Sorpresa handia izan da, beste lehiakideen artean zegoen maila altuagaz ez genuelako espero bigarren postua eskuratzea", kontatu du Natalia Mongek, bere amak. Gainera, txapeldunordeak bere osabak, Jon Ander Garamendi getxoztarrak, konposatutako musika originalagaz lortu zuen bigarren postua, amak eta Paula Alvarezek prestatutako koreografia bategaz.
Ruizek 7 urte zituela hasi zen patinatzen, eta, 12 dituenetik, hilean behin Valladolidera joaten da, askotan bera bakarrik ,Solo Dance modalitatean entrenatzen. Bere amak kontatzen du oso modalitate berria dela, eta, horregatik, arazoak izan dituztela iraganean txapelketetan parte hartzeko orduan. Modalitate honek dituen berezitasunen artean daude hiru maillot janzten dituztela, bat dantzaldi bakoitzerako, eta patinak ere bereziak direla. Hemen, Placido Santos entrenatzaileagaz aritzen da, hala ere, Solo Dance behar bezala entrenatzeko hilean behin joan ohi da Valladolidera.