ELA sindikatuak Getxoko Haurtegi haurreskolaren itxiera-prozesua ikertzeko eskatu die Ikuskaritzari eta Bizkaiko Lan Sailari. Horien ustez, "higiezinen espekulazio kasu argia" da, zentroaren egungo lursailetan etxebizitzen sustapen bat eraikiko dutela iragarri delako.
Sindikatutik jakinarazi dutenez, haurreskola itxi eta 17 lanpostu suntsitzeko, enpresak arrazoi objektibo-produktiboak eta ekonomikoak argudiatu ditu. Hala ere, sindikatuaren ustez, zuzendaritzak itxiera justifikatzeko "fikziozko kausak" sortu ditu. Azaldu dutenez, martxoan, enpresak jarduera-lizentzia kentzeko eskatu zion Eusko Jaurlaritzako Hezkuntza Sailari, eta, urtarrilean, ikasleen matrikulazioari uko egin zion.
Bestalde, Haurtegi Gova S.L. enpresak langileen ordezkariei emandako dokumentazioa aztertu ondoren, sindikatuak ondorioztatu du ez dagoela lan kontratuen % 100 azkentzeko arrazoirik, "eskaera neurrigabea baita". Gainera, enpresari informazio gehiago eskatu diotela jakinarazi dute, baina horrek modu kontzientean uko egin dio eskaera horri.
Hori guztia kontutan hartuta, eta, haurreskola kokatuta dagoen gunean etxebizitzak eraikiko direla jakin eta gero, sindikatuak prozesua "iruzur garbia" dela salatu du.