Arrantzalearen eskultura Luis María Íñiguez Paillolerena da (Getxo, 1935-1995), eta sardina-saltzailearena, berriz, José Luis F. Butronena (Bilbo, 1933). Lehenengoak kalte handiak ditu, bai buruan baita ezkerreko besoan eta arraunetan ere, horien zati handienak galdu baititu. Getxoko Udalak jakinarazi duenez, gaur egungo eskulturak hormigoizkoak dira eta errez kalte daitezke denboraren poderioz. Hori dela eta, etorkizunean jarriko dituztenak altzairu urtuaz egiteko erabakia hartu dute.
Oraingoz, moldeak egiteko, bi monumentuak eskaneatu eta horiei argazkiak atera dizkiete, teknologia berriak baliatuta erreprodukzio zehatzak egin ahal izateko. Janire Ocio Azpiegiturak, Obrak eta Zerbitzuetako zinegotziak azaldu duenez, 24.000 euroko kreditu gehigarria erabiliko dute irudi berrien moldea eta galdaketa egiteko. Zehaztasun horiek guztiak eman zizkion EH Bilduko zinegotzi Mikel Bildosolari batzordean, horrek galdetu baitzuen ea zer gertatuko den eskulturakaz, denbora asko baitaramate kaltetuta; zazpi urte inguru, hain zuzen ere.