Uribitakora

Portu zaharreko bikotea

Hemen duzue entzungai Galder Bilbao Txapik ALBEko kideak urriko HIRUKArako bidalitako argazkiari emandako erantzun ederra.

Murgildu egingo gara historian
oroitzapenei dale;
lur ta itsaso jardueretan
ez gara izan eskale,
hainbat soro erein ta landuz
baita arrantzatu bale.
Badaukagu txoko berezi bat
gertatuz hor hainbat ale;
Portu Zaharreko ogibide zen
sardinera eta arrantzale.

Gaur dena da ordenadorea
beti larri ta berandu,
garai berrietara moldatzea
saiatu eta ahalegindu.
Bizitza oso gogorra zela
bertakoek dute akordu,
abiadura handiko bizitzan
bertakoak gidatu ezin du,
nahiz ta besoa ta arrauna falta
nortasuna ezin kendu.

Izan zirelako izango gara
gure arbasoak biba!
eurek utzitako hondareatik
beharko genuke tira,
baliza egokia hartuta
ziaboga egin eta bira,
begi bat beti gure gainean
zaindari ta adi ari da;
talaian mendeak pasa dira
itsasoari begira.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun