Irudi batzuk errazak dira
denboran-eta kokatzen;
hala, guk sua ikusiz gero
plaza erdian loratzen
eta jendea pozarren dantzan,
laster gara konturatzen
solstizioa ailegatuta
San Juan ari dela ospatzen...
Eguzkiaren indarra orduan
zaigu barruraino sartzen.
Argazki honek hori guztia
pentsarazten du, jakina;
hausnarketa bat sortzeko beste
arrazoi badakar, baina:
bertan agertzen diren guztiak
neskak dira, alajaina!
Toki publiko hori hartuta,
iraultza dute egina:
etxe barrutik plazara joan
ziren andreak antzina!
Zer kantu dute ahoan haiek
dantzan dabiltzan artean?
Zer gura dute kiskali dadin
gaiztakerien kaltean?
Sugeak eta sorginak ziren
biktimak garai batean;
baina denborak aldatu dira,
igar bedi abestean:
andre guztiak eta sorginak,
erre ez, utzi bakean!