Ikuskizuna aurkezteko gaur izan den ekitaldian, Amaia Agirre Getxoko alkateak nabarmendu du horrelako proiektuen bitartez Udalak kultura harrobiaren aldeko apustu sendoa egiten eta konpainien lana balioesten duela. Lanaren zuzendari Eva Guerrerok adierazi duenez, lana "emakumeen borroka libreko ringean kokatutako dantza garaikideko ikuskizun tragikomikoa da". 80ko hamarkadaren amaierako Gorgeus Ladies of Wrestling telebista-programa estatubatuarrean oinarrituta, lau borrokalari taularatzen ditu (Garazi López de Armentia, Helenna Wilhelmsson, Leire Otamendi eta Estibaliz Vilal), horiek ere emakume batek (Bego Krego) arbitratuak. Dantzaren eta umorearen bidez, ironiaz jokatzen dute, konplexurik gabe, egunero artetik bizitzeak dakarren borrokari buruz. Zuzendariaren berbetan, lanak " prekarietatea, artea, emakumearen sexualizazioa eta lehiakortasuna bezalako gaiak " taularatzen ditu.
Komedia hori eraikitzeko muturreko estetika proposatzen du konpainiak, pertsonaia absurduakaz eta topikoen berrikuspenakaz. Hori guztia erritmo azkarrean erakusten da, lan fisikoan elementu berriak sartuz. Lanaren alderdi hori garatzeko, eta borrokaren alderdi teknikoa behar bezala gauzatzeko asmoz, borroka arteetan adituak diren Alvaro Orellana eta Aritz Arestiren partaidetza izan dute. Hain zuzen ere, erronka handienetako bat teknika horiek ikastea izan da, hortik aurrera beren gorputzetara egokitzeko eta sekuentzia organikoak garatu ahal izateko, dantza garaikidearekin bat eginez.