Aste Korala bueltan, aste-akabu honetan

Leioa Kantika Korala. © GETXOKO UDALA

Beste hainbat ekimen bezala, osasun-egoerak ezinezkoa egin zuen Aste Korala antolatzea 2020an; hala ere, oraingoan, Getxoko kultur programaziora itzuli da. Hala, zapatutik hasi, eta datorren astelehenera arte, Muxikebarri Antzokiak egitasmo horren 40. ekitaldia hartuko du. Kontuak horrela, publikoak Anúna talde irlandarraren eta Sjaella abesbatza alemaniarraren emanaldiez gozatzeko aukera izango du, baita Leioa Kantika Koralarena ere. Saioa guztiak 19:00etan izango dira, eta sarrerak salgai daude Getxoko Kultur Etxeko ohiko puntu eta kanaletan.

Ahots eta errepertorioen aniztasuna da programa horren ezaugarri ezagunenetako bat. Zaleek konposizio klasikoak, garaikideak, herrikoiak eta musika erlijiosoa entzun ahal izango dituzte, besteak beste. Errepertorioen aberastasunaz gain, talde gonbidatuen kalitatea azpimarratu behar da, partaideak nazioarteko jaialdi eta zikloetan zenbait sari eskuratu dituzte eta. Halaber, nabarmendu behar da Anúna eta Sjaella taldeak aurtengo Tolosako abesbatzen lehiaketa ospetsuan hautatuak izan direla.

Zapatuan, urriak 30, zabalduko da Aste Korala, Anúnaren eskutik, 1987an Michel McGlynn konpositoreak sortutako ahots mistoen talde irlandarra, hain zuzen ere. Ordutik, taldeak ibilbide oparoa egin du, 17 album grabatu ditu, eta nazioarteko hainbat lehiaketatan ospe handia lortu du. Normalean, 14 abeslarik osatzen dute talde hori, eta McGlynnek berak moldatutako Irlandako antzinako eta Erdi Aroko musika interpretatzen ditu, pieza originalakaz batera.

Domekan, Sjaellaren txanda izango da. Alemaniako emakumezko ahots-seikotea da hori musika-aniztasuna jorratzen duena, eta bere errepertorio zabalak genero eta garai desberdinak hartzen ditu: antzinako musika, gospeleko espiritualak, musika tradizionala eta jazzeko standardak. Europako talderik moldakorrenetakotzat jotzen da, eta mundu osoko musika-jaialdi ospetsuetan parte hartu du, hainbat sari eskuratuz.

Azkenik, azaroaren 1ean, astelehenean, Leioa Kantika Korak borobilduko du aurtengo egitaraua. Basilio Astulez zuzendariaren ekimenez 2001ean sortutako 11 eta 18 urte bitarteko 45 gaztek osatutako formazioak haur eta gazteen hezkuntza musikala sustatzea du helburu, eta estatu eta nazioarte mailan ospe handiena duten haur abesbatzen artean dago; izan ere, esparru horietan arrastoa utzi du bere sonoritate eta musikaltasunagatik eta bere dinamika koreografikoengatik.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun