Getxoko Udaltzaingoak pertsona bat atxilotu zuen astelehenean, azaroaren 1ean, Areetan aparkatuta zegoen ibilgailu bat indarrez zabaltzen ari zela. Udal-iturriek azaldu dutenez, polizia-patruila batek aurkitu zuen ustezko gaizkilea autoaren ondoan, ibilgailuak indarrez zabaldu izanaren zantzuak zituen, eta barruan egileak lapurtzeko zeraman burdinazko barra bat zegoen. Hala, dagozkion eginbideak egin ondoren, espedientea epaitegira bidali dute.
Gainera, jai-zubian, hiru pertsona ikertu dituzte bide-segurtasunaren aurkako delituak egiteagatik. Horietako bi baimendutako alkohol-tasak gaindituz gidatzen ari zirela aurkitu zituzten udaltzainek. Batak hirukoiztu egin zuen baimendutako odoleko alkohol-tasa (0,90), eta besteak 0,68ko emaitza eman zuen. Hirugarren pertsona bat ere ikertzen ari dira, Algortako kale batean aparkatuta zeuden beste lau ibilgailu kaltetu ondoren, handik alde egin ostean. Gidaria aurkitu zutenean, 0,48 mg/l-ko alkoholemia-emaitza positiboa eman zuen.
Era berean, beste gidari bati salaketa administratiboa jarri zioten, trafikoko arau-hauste bat egin, eta alkoholemia-probetan emaitza positiboa eman ondoren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
