Abenduaren 5era arte iraungo duen esperientzia 0 eta 12 urte bitarteko umeakaz harreman zuzena duten eta hizkuntza transmisioan zein eredugarritasunean eragina duten herritar helduak dira ariketako xehe taldea. Horretarako, helduak eta umeak elkartzen diren inguru informaletan (parkeetan, eskola kanpoaldean, plazetan…) ekimenaren identifikazio seinaleak jarriko dituzte aipatutako pertsonei gogoratzeko umeakaz euskaraz hitz egitearen garrantzia.
Hartara, "Haurren aurrean helduok heldu" ekimenean gurasoen, zaintzaile eta bestelako hezitzaileen partaidetza ezinbestekoa izango da, parkean, eskola inguruan hizkuntza ohiturak moldatzeko. “Azaroaren 22tik abenduaren 5era bitartean, haurren erreferente garen Getxoko guraso, senide eta, oro har, helduok hizkuntza ohiturak aldatzeko eta euskara gehiago egiteko aukera izango dugu. Gure seme-alabek euskaraz egingo dute, helduon artean euskaraz egiten eta ondo pasatzen ikusten bagaituzte”, azpimarratu du Isabel Atxak, haurtxo baten amamak. Bere aldetik, Aitor Uribarrik, San Nikolas ikastolako irakasleak, gehitu du helduen arteko hizkuntza portaerak berebiziko garrantzia duela belaunaldi gazteek euskararen jabekuntza osoa izan dezaten, euskararen eta haren balio sozialaren gaineko oharmen positiboa osa dezaten eta erabilera arau normalak barnera ditzaten: "Belaunaldi gazteengan eragitea eta haiek euskara normaltasunez erabiltzea lortu nahi badugu, helduok badugu zeresana eta zeregina. Ekimenaren bidez, hain zuzen ere, horretan eragitea da asmoa: euskararen transmisioa, misio posiblea delako”.
Jarduerak
Getxon ariketa praktikoa egiteko identifikatutako hainbat gune izango dira, hala nola udalerriko eskola guztietako sarrera-irteerak; Fadura eta Gobelako kiroldegiak; Iturgitxi, Gernika, Malakate, Santa Ana eta Bidezabal parkeak eta San Nikolas, Telletxe eta Bidezabalgo plazak. “Gune horietan guztietan, ekimenaren iruditegia duen elkartze-puntu bat egongo da eta ariketari nolabaiteko babesa eta ikusgarritasuna emateko, parte hartzaile helduek pegatina bat jarri beharko dute. Horrez gain, ekimenean parte hartzen duten helduak aktibatzeko ekintza desberdinak antolatuko dira. Esate baterako, azaroaren 26an eta abenduaren 3an helduen arteko ginkanak egingo dira Malakaten, San Nikolas plazan eta Santa Eugenia plazan, eta tailerrak eta jolasak ere. Kaleko eta eskoletako espazioez gain, etxea ere izango da ariketa egiteko gune”, amaitu du Mikel Astorki Bizarra Lepoan elkarteko kideak.