Euskalgintzaren Kontseiluko idazkari nagusia

Etorkizuneko jauzia

Ate-joka dugu 2021eko Euskararen Nazioarteko Eguna. Egia da, bai, gauza askotarako baliatzen dugula egun hori, besteak beste, euskaraz bizi nahi duen herri-gogo sendoa eta indartsua dagoela erakusteko. Gainera, zalantzarik ez komunitateak are harroago erakutsiko duela aurten bizi-gogoa, iaz garai honetan bizi genituen murrizketak gogoan.

Hori horrela izanik ere, uste dut egun horrek egoerari buruzko hausnarketa egiteko ere balio beharko ligukeela, bai eta ifrentzua zein den identifikatzeko ere. Nik esaldi batera ekarriko nuke geure egoera: euskaldunok ez ditugu bermatuta euskara eroso erabiltzeko baldintzak.

Hau da, herritarrok hizkuntza erabiltzeko hautuari determinazioz eusten badiogu ere, ez dugu bermatuta hautua. Hortaz, ez da nahikoa herritarrok ahalduntzea, eta, beraz, ezin da hizkuntzaren berreskurapen-prozesuaren zama guztia herritarren bizkarrean utzi.

Aitzitik, hizkuntza-politiketan jauzia egiteko garaia da; euskararen erabilera erosoa bermatzea ipar izango duten politikak behar dira. Eta ehundik gora eragilek badugu adostua, Batuz Aldatu dinamikaren bidez, zein diren helburu horretara iristeko norabidetzeak: ezagutzaren unibertsalizazioa eta erabilera erosorako espazioak sortzea.

Hartara, balio beza aurtengo Euskararen Nazioarteko Egunak komunitatearen ahalduntzeaz harago, hizkuntza-politiketan jauzia egiteko beharra gizarteratzeko.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun