Finalera heldu aurretik, ibilbide luzea egin du Bizkaiko Txapelketak. 2020ko maiatzean jokatzekoa zen Udaberriko Fasea irailean jokatu zuten, eta udazkenekoa, aldiz, 2021era atzeratu behar izan zuten.
2021ko urrian hasi zuten atzeratutako txapelketa, eta sei kanporaketa jokatu dituzte, 36 bertsolariren parte hartzeagaz. Finalaurrekoetan, zortzi bertsolari zeuden zain, 2018ko finalistak, eta kanporaketetatik sailkatutako 10ekin batu ziren. Horietatik guztietatik, zortzi arituko dira finalean, tartea, Jone Uria getxoztarra.
Txapel-jartzaileak: Joseba Etxebarria eta Moises Enbeita
Lehenengo bider, lagun bik batera jantziko diote txapela Bizkaiko Bertsolari Txapeldunari. Horrelaxe ibili dira urte luzeetan Joseba Etxebarria eta Moises Enbeita: elkar eta taldean beharrean.
Bizkaiko Txapelketako Talde Antolatzailearen erabakia izan da. Biak dira urte luzez talde horren parte eta, aurten, eurak omentzea erabaki dute beste kideek. Elkartetik urte guztiotan egindako ekarpena azpimarratu gura izan dute. Izan ere, nabarmentzekoa da bertsolaritza zelan ulertu eta transmititu duten, jardun kolektibo moduan. Eta hori hain ondo ulertuta, taldeari egin dioten ekarpena ere, azpimarragarria da: Elkarteko zuzendaritzari eta, bereziki, Txapelketako Talde Antolatzaileari.
Biek batera txapela janzteagaz taldean egiten denak duen balioa azpimarratu eta sinbolizatu gura izan du Elkarteak, eta hori biek erakutsi dute.
