Amaknives, etxean egindako labanak

Arkaitz Madariaga: “Sukaldaria naiz ogibidez, eta hortik datorkit aiztoak forjatzeko grina”

Sukaldari batek inork baino hobeto jakin ohi du zer-zelako garrantzia duen labana on batek sukaldean. Arkaitz Madariagaren kasua da hori; ogibidez kozinatzeko sutegien artean dagoen arren, duela hiru urte forjako suaren ondoan, mailua eskuan, bere aizto propioak ekoizteari ekin zion. Dioenez, labana japoniarrak sortzen ditu, eskuz egindakoak; askotarikoak: bunka, kiritsuke eta sushi-a edo sashimi-a egitekoak. 

Madariagak azaltzen duenez, orain hamar urte bururatu zitzaion bere aizto propioak egitea. Orduan hasi zen informazioa biltzen, eta ganibet txikiak egiten. “Hasieran, lagunentzat egiten nituen, baita niretzat ere, lanean erabiltzeko”, diosku. Urterik urtera, baina, forjatzaileen munduan sartzen hasi eta, duela hiru urte, propanozko forja txiki bat erosi zuen. Ordutik, Instagram bidez (@Amaknives) bere produktuak saltzen ditu, enkarguz. Karbono altua duen altzairua erabiltzen du aiztoak egiteko, eta damaskoa zein bestelakoak egiten ditu horiei forma emateko. Dioenez, 70 eurotik aurrera saldu ohi ditu bere lanak, “baina norberak gura duenaren arabera prezio bat edo beste izan dezake labanak”. Halere, denen artean gehien saltzen dituena kiritsukeak dira: “Denetarako balio dute”.

Arkaitz Madariagaren aizto japoniar bat irabazi gura duzu? Bada, bat zozkatzen dugu; egin klik hemen eta parte hartu zozketan!

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun