Getxoko Udalak “Lonjak piztu 2022" programa jarri du abian

Lonja bat hutsik, artxiboko irudian.

Getxoko Udalak "Lonjak piztu 2022" programa jarri du martxan; hala, 50.000 euro bideratuko ditu COVID-19aren ondorio sozio-ekonomikoei aurre egiteko Getxo Ekinez planaren barruan dagoen ekimen horretarako. Laguntza horiek eskatzeko epea 2022ko urtarrilaren 17tik apirilaren 30era bitartekoa izango da. Ondoren, kreditu eskuragarririk egonez gero, maiatzaren 1etik urriaren 31ra  eskatu ahalko da. Gainera, urtarrilaren 10ean, 13:30ean, informazio-saio bat egingo da Getxo Elkartegian, deialdiaren xehetasunen berri emateko.

Merkataritza-erabilerarako lokalak alokatzeko laguntzak pertsona fisikoei (autonomoei) zuzenduta daude, baita ondasun-erkidegoetako bazkideei eta nortasun juridikorik gabeko sozietate zibilei eta kasu hauetan dauden legez eratutako pertsona juridikoei ere:

  1. Jarduera ekonomiko berria.
  2. Establezimendu berri bat irekitzea, Getxon lehendik dagoen establezimendu bat lekuz aldatzea ez badakar. Udalerrian dagoeneko beste negozio bat duten eta establezimendu berri bat irekitzen duten enpresek jarduera egiten duten lokala irekita eduki beharko dute gutxienez establezimendu berriaren diru-laguntza jasotzeko epean.
  3. Etxebizitza batean edo bulego-eraikin batean garatzen ari den jarduera ekonomikoa.

Gainera, eta beste baldintza batzuen artean, diru-laguntzaren xede den lokala ezin izango da egon jarduera bereko beste lokal batetik 200 metro baino gutxiagora (ofizioz egiaztatuko da); mikroenpresa bat izan beharko da, taldea ez da 10 langile baino gehiagokoa izan behar eta alokairuaren kostuak ez ditu zenbateko hauek gaindituko: Algorta 14 euro / metro koadro, Areeta 18 euro / metro koadro eta Romo 14 euro / metro koadro (BEZik gabe).

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun