Ana Bejerano getxoztarra Mocedades taldeko abeslari bakarlaria izan zen 1985 eta 1994 urteen bitartean, Amaia Urangaren ordezkatuz; tarte horretan hiru disko grabatu zituen taldeagaz: Tienes un amigo, Ana y Miguel eta Las Palabras. Horrez geroztik, abeslari moduan jarraitu zuen, eta, besteak beste, Txarango taldea sortu zuen Roberto Uranga, Jose Ipiña Mocedadeseko taldekideakaz eta Amaya eta Javier Saizar Trigo Limpio taldeko kideakaz. Gerora, Bejeranok bakarlari moduan ere jarraitu zuen, eta 2019an, Mocedades taldera bueltatu zen 50. urteurreneko bira egiteko.
"Pertsona ona, lagun ona eta lankide hobea joan zaigu. Ziur gaude zeruan kantuan ariko dela berari gustatzen zitzaion bezala", argitaratu du Javier Garayk, Mocedadesko kideetako batek, bere sare sozialetan. Gogoratu duenez, "Amayak alde egin ondoren, Anaren ahotsak gure jarraipena ziurtatu zuen; ezinbestekoa izan zen Mocedadesentzat".
Abeslaria 60 urte zituela zendu zen atzo, urtarrilaren 2an, digestio-aparatuko arazo larri baten ondorioz. Abeslariaren ingurukoek ohar baten bidez jakinarazi dutenez, hileta gaur, abenduaren 3an, izango da, 19:00etan, Areetako Santa Ana elizan.