Muxikebarri Antzokiko programazioan parte hartzeko deialdia zabaldu dute Getxoko kultur elkarteentzat

Getxoko Kultur Etxeak deialdi berria zabaldu du Muxikebarriko kultur programazioan kultur elkarteen parte-hartzea sustatzeko eta lan eta proiektu artistikoen emanaldiak bultzatzeko. Ekimena, pandemiak kaltetutako hainbat sektore biziberritzeko Getxo Ekinez planaren barruan dagoena, askotariko proiektuei irekita dago, hala nola musika, zinema, antzerkia, umorea, haurrentzako ikuskizunak, errezitaldiak, bertsoak edo beste edozein diziplina artistiko, eta horretara proiektuak aurkezteko epea otsailaren 8ra arte egongo da zabalik.

Deialdi honetan parte hartu ahal izango dute Getxoko udalerrian egoitza soziala duten irabazi asmorik gabeko kultur elkarteek, baldin eta Getxoko Erakundeen Udal Erregistroan inskribatuta badaude. Gura beste proposamen aurkeztu ahal izango dituzte, Kultur Etxeko programazio irizpideakaz bat badatoz, edozein hizkuntzatan eta gehienez bi orduko iraupenagaz. Proiektu horiek getxoztarren partaidetza izan behar dute, baita proposamenaren zuzendaritza eszenikoaren jatorrizko egiletza ere, argitaragabea zein antzeztua izan.

Guztira, 60.000 euro bideratuko dituzte gehienez deialdira, eta 5.000 euroko gehienezko gastua ezarriko dute proposamen bakoitzeko. Kultur Etxeko teknikariak arduratuko dira proposamenak ebaluatzeaz, eta horien artean gehienez 20 hautatuko dira. Proiektuak Ereaga, Arrigunaga edo Areeta aretoetan erakutsi ahal izango dira aurtengo martxotik abendura bitartean, betiere ohiko programazio-datak horretarako aukera ematen badu.

Kultur Etxeak proiektuen erakusketa-kostuak soilik ordainduko ditu, eta hautatutako elkarteak ikuskizunaren diru-bilketagaz geratuko dira, ikuskizunetarako sarrera doakoa ez bada. Taldeek eurek kudeatu beharko dituzte gonbidapenak edo sarrerak.

Nola aurkeztu proiektuak?

Proposamenak bide telematikoz bakarrik aurkeztu ahal izango dira, Getxoko Udalaren erregistro elektronikoaren bidez, eta deialdiari buruzko informazio osoa hemen dago eskuragarri. Gainera, ekimen honetan parte hartu gura duten erakundeei arreta emateko, Getxoko Kultur Etxeak bilera bat antolatuko du ekimenari buruzko zalantzak argitzeko eta hautatutako proposamenek hartuko dituzten espazio eszenikoak erakusteko. Bilera urtarrilaren 25ean izango da, martitzenean, bi saiotan: 18:00etan (gaztelaniaz) eta 19:00etan (euskaraz).

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun