Atxilotu bat, bi pertsona ikertuta eta 250 litro alkohol konfiskatuta Algortako inauterietan

Erredakzioa 2022ko mar. 7a, 10:43

Artxiboko irudia.

Getxoko Udaltzaingoak 42 jarduera egin ditu aste-akabuan Algortako erdialdean, inauterien ospakizunak zirela eta egindako prebentzio-operatiboan, tokiko Udalak jakinarazi duenez. Besteak beste, pertsona bat atxilotu zuten borroka batean parte hartzeagatik eta beste bat ikertzen ari dira lapurretak egiteagatik.

Barikua, ospakizunaren lehen eguna, gorabehera aipagarririk gabe igaro bazen ere, zapatu arratsalde-gaua, ordea, intentsitate handikoa izan zen, eta agenteek 42 esku-hartze egin zituzten.

Pertsona bat atxilotu zuten borroka batean parte hartu, ihesean atera, eta geldiarazi zutenean, indarkeriaz aurre egiteagatik. Halaber, eginbideak ireki zitzaizkion, osasun publikoaren aurkako ustezko delitu bat egotzita, konfiskatu zitzaizkion honelako objektuak edukitzeagatik: diru zatikatua, doitasun-balantza eta substantzia estupefazienteak.

Beste pertsona bat ikertzen ari dira gama altuko hiru telefono mugikor lapurtzeagatik eta beste bat edari alkoholdunen eraginpean gidatzeagatik; izan ere, baimendutako tasa laukoizten zuten emaitzak eman zituen.

Gainera, agenteek 250 litro alkohol baino gehiago atzeman zizkieten adingabeei. 12 eta 13 urteko bi neskari lagundu behar izan zieten alkohol gehiegi edateagatik, eta ospitalera eraman zituzten. Gurasoei horren berri eman zieten.

Era berean, 11 bozgorailu eta musika-aparailu konfiskatu zituzten, 10 salaketa bideratu ziren bide publikoan txiza egiteagatik, eta ostalaritzako lokal bat salatu zuten ixteko ordutegia ez errespetatzeagatik.

Azkenik, Udaltzaingoak jakinarazi du 12 objektu berreskuratu dituela, tartean hiru telefono mugikor.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun