Serifalaris egitasmoak bere hamargarren urteurreneko programa 2021eko irailean hasi zuen, eta hainbat esperientzia "klandestino" proposatu zituen, sarrerak agortu zituztenak; azaroa eta urtarrila bitartean mentoretza-programa berri eta esklusibo bategaz jarraitu zuen, eta apirilaren 1ean eta 2an izango du amaiera. Antolakuntzako arduradunek hitz eman dute ezustekoak eta jaialdiaren amaiera oso berezia izango ditugula, jarraitzaileek gustuko duten bezala. “Diseinuaren etorkizunari begiratuko diogu, Euskadin eta haratago diseinuaren eta sormenaren inguruan komunitate indartsua sortzea lortu duen jaialdiaren lanbidea eta hamar urteak ospatuko ditugu”.
Amaia Aguirre alkateak adierazi duen bezala, “Serifalaris estatuan diseinu grafikorako eta sormenerako erreferentzia-puntu gisa finkatu den Biltzar profesionala da, nazioarteari ateak irekitzen dizkiona. Bere X. urteurrenean Getxorako ekitaldi estrategiko bihurtu da, Kultura eta Sormen Industrien eta Getxoko eta inguruko enpresen profesionalizazioaren aldeko apustuan”.
Marina Goñik eta Peio Atxalandabasok esan dutenez, "Serifalaris diseinatzaileek eta diseinatzaileentzat antolatutako biltzar profesionala da. Horri esker, urtero etorri eta errepikatzen duten pertsonen behar eta gustuekin bat egin dezakegu. Horrek antzeko beste topaketa batzuetatik bereizten gaitu, eta erreferentziako hitzordu gisa finkatzen gaitu horrelako ekimenak iragankorrak diren sektore batean".
Egitaraua
Jaialdian honako hauek egongo dira: Pepe Gimeno, 2020ko Diseinuko Sari Nazionala; Txema Salvans argazkilaria, Perfect Day lanaren egilea, Mediterraneo kostaldeko agertoki degradatuetako aisialdiari buruzko 15 urteko lan artistiko eta dokumentalaren, eta Relajaelcoco branding estrategikoaren estudioa. Emakume diseinatzaile ugari ere egongo da, horien artean: Genie Espinosa, diseinatzailea, ilustratzailea Hoops komikiaren egilea, fantasia distopiko, feminista eta post millenial saritua; Inma Bermúdez diseinatzailea, IKEAren eta Lladróren kolaboratzailea, besteak beste; Nuria Vila, bere lan-prozesuetan jasangarritasunagaz eta ingurumenaz konprometitua, eta Rebeka Arce, Bilboko diseinatzaile gaztea, proiekzio handikoa eta ZINEBI edo Getxophoto-rako kanpainen egilea. Holandatik, Trapped un Suburbia estudioko arduradunak etorriko dira, "Diseinuen Harry Potterrak" izenez ezagunak, eta KesselsKramer agentziakoak.
Serifalaris jaialdiak aurreko edizioetako ahotsetako bat berreskuratu gura izan du hamargarren edizio honetan. Bere izpiritu jostagarrienari leial, sare sozialetako jarraitzaileen esku utzi zuen aukeraketa, eta Javier Jaenen alde bozkatu zuten. Feroz 2022 Sarien 9. edizioan, Almodovarren Madres paralelas filmerako kartela saritu zuten eta 2021eko abuztuan polemika piztu zuen Facebookek zentsuratu zuenean. 2020an, Forbes aldizkariak 100 espainiar sortzaileenetakotzat jo zuen Jaen.
Sarrerak salgai daude jaialdiaren webgunean, www.serifalaris.com: 70 euroko prezioan bi eguneko pack-a, eta 40 euroko prezioan egun soltea.