Algortako Villamonteko kultur etxea eraberritzeko obren lehen faseari hasiera eman diote. Hala, datozen hilabeteetan, iazko aurrekontu parte-hartzaileen proposamenen barruan Udalak onartutako proiektuaren lanak egingo dituzte, bertako instalazioak modernizatzeko.
Lanek, besteak beste, klimatizazioa eta lokalaren argiztapena hobetuko dituzte. Gainera, dauden eremuen banaketa erabilgarriagoa planteatuko dute. Horrela, erakusketa-aretoa lokalaren ezkerraldean kokatuko da, eta azalera handiagoa izango du, Torreneko erakustareto zaharraren antzekoa; horretarako, lokalaren bulego-gune zaharren zati bat hartuko du.
Bestalde, liburutegiak ere aldaketak izango ditu, eta irakurketa eta ikasketa postuen banaketa optimizatuko da.
Azkenik, obren ondoren, lagapenetarako erabilera anitzeko gela berri bat egingo dute bertan, eta lokalak mota horretako sei gune izango ditu guztira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
