Euskarazko kultura kalera ateratzeko Kalefest jaialdia egingo dute Getxon maiatzetik urrira bitartean

Kalefest euskarazko kaleko arteen jaialdiaren egitarauak doako sarrera duten 29 ikuskizun bilduko ditu, eta herriko auzo guztietan banatutako 10 kokalekutan egingo dira. Irantzu Uriarte Getxoko Kultur Etxeko lehendakariak azaldu duenez, euskarazko kulturari protagonismoa eman gura izan diote askotariko ikuskizunen bidez: dantza, antzerkia, zirkua, zinema eta diziplina anitzeko lanak.

Antzerkiaren atalean, besteak beste, honako lan hauetaz gozatu ahal izango du publikoak: Kale gorrian, etxegabetzeak satiratik jorratzen duena, eta Legea gu gara, gaurkotasun sozialeko komedia. Horiez gain, gizakien barne mundura zuzendutako umore eta ikusmen handiko bidaia, eta genero ikuspegia eta transgenero identitate bezalako gaiak islatzen dituzten bi muntaia ere egongo dira: Psike eta Bidearen amaieran. 35 huts antzezlanean, berriz, adin batetik aurrera sinesmenak eta amatasuna birplanteatzea bezalako alderdiak ukituko dira, eta Akabo obran suizidioaren gai polemikoa jorratuko dute oso umore berezi batetik abiatuta.

Dantzari dagokionez, Gazte, Qué tienen las flores, Topa, Dye Dye Dye, Otempodiz, Otempodiz eta Musu baten eztanda uhina pieza garaikideak eskainiko dituzte. Horietan, besteak, beste, gazteen inkonformismoa, estilo anitzen fusioa, Afrika-Euskadi konexioa eta feminitatea jorratuko dira. Azkenik, Geure[r]a, lana ere izango da ikusgai, dantza esekia, bideo-mapping-a eta musika uztartzen dituen pieza bikaina.

Bestalde, E.go, Mikra eta Aukerak zirku-lanek akrobaziak, malabarrak eta ikuspegi garaikidetik landutako beste teknika batzuk hurbilduko dituzte. Horiekaz batera, Aquiles, formatu handiko figura protagonista duen lan ibiltaria, eta Rotonda Circus, inprobisazioaren aldeko apustua egiten duen ikuskizun sailkaezina ere egongo dira. Azkenik, Kalefestek zine-eskaintza anitza programatu du, haurrentzako, familientzako gazteentzako eta helduentzako filmak bildu dituela.