Abuztuaren 10ean ospatuko dute San Lorentzo azoka Algortan, bi urteko geldialdiaren ondoren

San Lorentzo azoka Getxoko ospakizun herrikoien egutegira itzuliko da abuztuaren 10ean. Hori dela eta, Getxoko Kultur Etxeak saltokiak eta txosnak esleitzeko deialdia ireki berri du. Merkatuan parte hartu gura duten ekoizleek uztailaren 6ra arte bidali ahal izango dituzte eskabideak.

Algortako San Nikolas eta Biotz Alai plazek hartuko dituzte berriro ere Getxoko Kultur Etxeak eta BBK Fundazioak antolatzen duten azoka honetako saltokiak. Merkatua goizeko 10:00etan zabalduko da eta 14:30ak arte egongo da martxan.

Ohi bezala, bisitariek euskal baserriko produktu ugari erosi ahal izango dituzte San Lorentzo Egunean: barazkiak, frutak, gaztak, pateak eta ahatekiak, ogia, pastelak, eztia, txokolatea, sagardoa eta txakolina eta landare apaingarriak besteak beste, produktu ekologikoak ahaztu gabe.

Abesbatzaren kontzertua

Jaieguna borobiltzeko, bertoko Biotz-Alai abesbatzak ohiko kontzertua eskainiko du Muxikebarrin 22:00etan. Saiorako gonbidapenak Muxikebarri eta Romo Kultur Etxean jaso daitezke, uztailaren 5etik aurrera.

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun