Eskolakaz eta familien elkarteakaz egindako bileren ondoren, egitasmoagaz bat egin duten zentro interesatuak dira Andra Mari, Azkorri, Geroa Ikastola, Gobela Ikastola, Juan Bautista Zabala, Larrañazubi, Madre del Divino Pastor, Nuestra Señora de Europa, Romo, San Ignazio, San Nikolas Ikastola, Santísima Trinidad eta Zubileta.
Abian dagoen diagnostiko fasea datorren ikasturteko lehen hilabeteetan luzatuko da. Helburua da ikasleen mugikortasun-ohiturak aztertzea eta ikastetxe bakoitzaren inguruneari eta bertara heltzeko erabiltzen diren bide nagusiei buruzko informazioa biltzea segurtasunaren eta irisgarritasunaren ikuspegitik.
Horretarako, hainbat tresna erabiliko dituzte, hala nola familiei, irakasleei eta ikasleei zuzendutako inkestak edo ikastetxeetako sarreretan behaketak, besteak beste. Gainera, ikasleek eskola-ingurunearen diagnostikoa ere egingo dute, puntu beltzak eta arriskuak sortzen dituzten jokabideak zeintzuk diren hautemateko. Horrela, hezkuntza-komunitate osoaren parte-hartzea lortuko da.