57 urteko getxoztar bat hil zen atzo, domekan, Bilboko Deustu auzoko pasealeku berrian auto batek harrapatuta. Istripua arrastiko 18:30ak aldera jazo zen, Ballets Olaeta kalean, IMQ ospitaletik gertu; ibilgailua errepidetik atera, pasealekuan sartu eta oinezkoa harrapatu zuenean. Osasun langileak gizona salbatzen saiatu ziren, baina ezin izan zuten ezer egin, momentuan hil baitzen.
Bilboko Udaltzaingoak jakinarazi duenez, istripua izan zuen ibilgailuaren barruan bikote bat eta haien alaba adingabea zihoazen; iturrien arabera, dirudienez, IMQ ospitaleko larrialdietara zihoazen istripua izan zutenean.
Ezbeharraren ondoren, poliziek emakumea bakarrik topatu zuten ibilgailuaren barruan, zaurituta. Gidaria, aldiz, ospitalearen barruan topatu eta identifikatu zuten.
Gizonezkoak negatibo eman zuen alkohol- eta droga-probetan, baina hura atxilotu zuten ausarkeriaz gidatzeagatik eta zuhurtziagabekeriazko giza-hilketaren ustezko delituagatik.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
