Beste urte batez, Getxoko Udalak "Hazi eta hezi, oferta educativa extra escolar en euskara" kanpaina abian jarri du, eskola orduez kanpo haur eta gazteentzako euskarazko eskaintza duten zentroen eta familien arteko zubi-lana egiteko. Horretarako, Udalak online bidezko gida bat prestatu du aipatutako eskaintza duten zentroen (guztien % 35) informazioagaz, herritarren artean informazioa zabaltzeko.
Zentroak hainbat arlotakoak dira, horien artean, aholkularitza psikopedagogikoa, eskola laguntza, euskara, musika, pintura eta eskulanak, informatika, sukaldaritza, dantza, antzerkia eta zirkua. “Ekimen honekin esfortzua egiten dugu euskararen erabilera hezkuntza ez arautuan ere sustatzeko, ezinbestekoa iruditzen zaigulako aukera hori izatea”, adierazi du Irantzu Uriarte Euskara zinegotziak.
Aipatutako zentroek kanpainan parte hartzeko Udalagaz sinatu duten hitzarmenaren arabera, konpromisoa hartu dute hizkuntza-paisaia, publizitatea eta gizarte sareak euskaraz ere jartzeko, webgunea euskaratzeko eta kanpainaren materiala erabiltzeko, besteak beste. Udalak zabaltzen lagunduko du, 100 kartel 2.000 postal eta zentro kolaboratzaileen kartel pertsonalizatuaren bidez. Horiekaz batera, udalerriko ikastetxeetan ekimenaren barri zabalduko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
