Bolueko Hezeguneko Esfortzu Konstanteko Eraztunketa-Guneak bere ateak zabalduko ditu jendearentzat zapatuan, urriak 1, Hegaztien Mundu Eguna ospatzeko. Getxoko Udalaren Ingurumen Arloak antolatuta, "Getxonatura, ezagutu eta zaindu ezazu" zikloaren barruan, helburua da hezegunearen hegazti-fauna, haren problematika eta egiten diren jarduerak ezagutaraztea. Jardunaldian, hegaztiei eraztuna ipintzeko ohiko ekintza zientifikoa gauzatuko da, 09:00etatik 12:30era, beti ere eguraldi ona egiten badu, euria edo haize gogorra egitekotan bertan behera utziko baitute, arriskutsua delako hegaztien segurtasunerako.
Jarduera Begoña Valcarcel eta Sergio de Juan adituek zuzenduko dute, ikasten ari diren estazioko eraztungile taldearekin batera, Bolue Ingurumen Ikerketak eta Equinoccio Naturak koordinatuta. Bertaratutako jendeari hegaztiei eraztuna ipintzeko teknika azalduko zaio, bai eta zer eskakizun bete behar diren eta zer garrantzi duen hegaztiak ezagutzeko eta kudeatzeko, maila globalean zein lokalean.
Hegazti basatiak harrapatzean, eraztun zientifikoak jartzeko, baldintza klimatologikoak eta ordutegia garrantzitsuak dira; beraz, goizeko lehen orduotan joatea gomendatzen da.
Jarduera doakoa da eta boluenatura@gmail.com helbidean izena aurretik ematea gomendatzen da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
