Atzo, eguenean, MintzaPoza tonbola egin zuten Itzubaltzeta/Romon, eta gaur, barikuan, Algortara egingo dute salto askotariko sariak banatzeko. Egitasmo horren bidez, Berbalagun eta Gurasolagun egitasmoak ezagutarazten arituko dira.
Joan den irailaren 13an abiatu zuten aurtengo Berbalagun egitasmoaren kanpaina Euskal Herriko hainbat txokotan, eta, MintzaPoza tonbolaren bidez, mintzapraktikarako aukera hori ezagutarazten arituko dira egunotan herriz herri eta auzoz auzo. Hala, atzo, eguenean, Romon aritu ziren, eta gaur, barikuan, Algortako San Nikolas plazan egongo dira askotariko sariak banatzen, 18:30etik 20:30era.
MintzaPoza tonbolan parte hartzeko esaldi ezkutua asmatu behar da (urkatuaren jolasean bezala) eta ostean erruletari bira eman, erruletak aginduko du oparirik jasoko den eta zein izango den.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.