Iberdrola Supera sarien hirugarren edizioak joan den eguaztenean jakinarazi zituen sei kategorietako irabazleak, eta bakoitzak 50.000 euroko diru-hornidura jasoko du, emakumeen kirola bultzatzeko diseinatutako 600 proiektutatik aukeratuak izan ondoren. Hala, besteak beste, 16 urte arteko nesken artean oinarrizko kirola sustatzeko Supera Base saria Getxo Irristan Patinaje eta Hockey Klubak jaso zuen, lehiatu ahal izateko azpiegiturak egokitzeko asmoz.
Ildo horretan, saritutako taldeak jakinarazi du beti izan dutela argi ibilbide-orria, eta uste dute eskola eta klubetako kirol-jarduerek tradizionalaz bestelako planteamendu bat behar dutela. “Gure helburua genero-berdintasuna lantzea da, neskek eta mutilek talde mistoetan parte hartuz. Talde horietan, neskek ahalik eta gehien garatzen dituzte beren trebetasunak, eta gizonekin batera lehiatzen dira kirol-errendimenduaren maila berean”.
Getxo Irristan Taldekoek gogoratu dutenez, hasieran, 20 lagun ziren taldean, eta, gaur egun, 200 baino gehiago dira. Hori dela eta, azpimarratu dute premiaz behar dutela euren jarduera gauzatzeko eta klub gisa hazten jarraitu ahal izateko gune bat, eta, sariketa honek, bidean laguntzeko urrats bat aurrera egingo dutelakoan daude.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
