150 negozio baino gehiago lehian daude Getxoko erakusleihorik onena izateko

Iker Rincon Moreno 2022ko abe. 15a, 13:52
Lehiaketan parte hartzen ari den erakusleihoetako bat. © GETXO ENPRESA

Epaimahai profesional batek hautatuko ditu Getxoko erakusleiho fisiko eta digital onenak. Denera, 150 erakustoki baino gehiago aurkeztu dira aurtengo Erakusleiho Lehiaketara, eta abenduaren 20an egingo dute sari-banaketa, 20:30ean, San Joseren jauregian.

Eduardo Herrera (EHUko Arte Ederren Fakultatea), Iñigo Bastida (erakusleiho-erakuslea), Macarena Guirles (Barria Arte), Regina Zabala eta Amaia Rementeria (Argi Arte) eta Begoña Mendialdua (El Taller & Co) izango dira erakusleiho fisiko onenak erabakiko dituzten epaimahaikideak. Eta hauek dira erakusleiho birtualaren (web eta sare sozialak) irabazleak erabakiko dituzten diseinuaren, teknologia berrien eta online komunikazioaren adituak: Jon Barragan (Zorraquino), Regina Zabala eta Amaia Rementeria (Argi Arte), Sara Inunciaga (Summa & B10 Projects), Unai Pardo (Ininin2), Natxo Pinedo (La Máquina de Exprimir) eta Javier de Rivas (On Tour Up).

Getxoko Erakusleihoen Lehiaketagaz batera, Balkoien eta/edo Leihoen Dekorazio Lehiaketa egin da aurten. Lehiaketa berriaren helburua bikoitza da: Getxoko bizilagunek euren etxeak eta kaleak ederragotzea eta bizitza eta ilusioa sortzea, azaldu dutenez.

40 sari baino gehiago banatuko dituzte bi lehiaketen artean, aurreko edizioan baino 10 gehiago, hala nola koadroak, Gabonetako eta kosmetikako saskiak, hoteleko egonaldiak, operarako eta museoetarako sarrerak, bitxiak, kirol, gastronomia eta upategietako esperientziak, txangoak eta edertasun eta spa zerbitzuak eta komunikabideetako publizitatea.

Aurkeztutako proposamen guztiakaz, antolatzaileak, Getxo Enpresak, mapa interaktibo bat jarri du jendearen eskura, telefono mugikorretik eskuragarri, eta ibilbideak bere webgunean, jendeak Erakusleiho Fisikoa kategorian parte hartzen duten erakusleihoak bisitatu ahal ditzan.

Erakusleiho guztiak ikusteko, sakatu hemen.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun