Getxoko Aparkaldi Zerbitzu Arautuko (TAO) egoiliarrentzako aparkaleku-baimenak ofizioz luzatuko dituzte automatikoki 2023ko urtarrilaren 1ean, interesdunak data hori baino lehen baja eskatu ezean. Baimenaren tasa ordaintzeko epeari dagokionez, helbideratu gabeko ordainagiriak Udalaren aurtengo zerga-egutegian zehaztuko den borondatezko ordainketa-epearen barruan ordaindu beharko dira, egoiliarraren etxera bidaliko den ordainketa-agiriaren bidez. Behin Egutegi Fiskala onartuz gero, Udalaren webgunean argitaratuko dute. Jaso ezean, kopia bat eskatu beharko da Herritarren Arretarako Bulegoetan (HABak).
Helbideratutako ordainagiriak dagokion kontuan zordunduko dira borondatezko ordainketa-aldia amaitu ondorengo lehen egun baliodunean edo “nahierako ordainketa”n aukeratutako modalitatean adierazitako egunetan (https://www.getxo.eus/eu/tramites/mi-pago).
Bestalde, udal-arduradunek gogoratu dute, Udal Ordenantzan ezarritakoaren arabera, daborduko ez dagoela egoiliarrentzako TAOren bereizgarri fisikorik, eta, beraz, ez dela beharrezkoa izango ibilgailuan ezer jartzea. Beraz, 2023ko ekitaldirako ez dute inolako bereizgarririk bidaliko etxera, aurreko urteetan bezala.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
