Uholde-arriskuko guneetatik kotxeak kentzeko gomendatu du Getxoko Udalak

Iker Rincon Moreno 2023ko urt. 16a, 22:29
Gobela ibaia gaur, gaueko 20:40ak aldera. © ARANTZA GUTIERREZ

Prezipitazio handien ondorioz, prebentzio-neurriak ezarri ditu Getxoko Udalak Gobela ibaiaren inguruko zenbait tokitan. Hala, arrisku bereziko eremuetan bizi diren pertsonei abisua eman diete autoak kentzeko, eta udal-langileak Salsidu inguruan aritu dira lur-zakuak jartzen urak gainezka egin ez dezan. Inguruko bizilagunak larritasunez bizitzen ari dira momentuok eta auzokideen elkarteek Udalak abiatutako zaintza-neurriak eskasak direla deitoratu dute.

Getxoko Udalak jakinarazi duenez, Larrañazubi inguruan bizi diren pertsonei zakuak eskaini zaizkie, behar izanez gero erabil ditzaten. Aurrekoetan bezala, Eusko Jaurlaritzako Larrialdi Sailak euri iraunkorragatik ezarritako abisu horia dela eta, Udaltzaingoak Gobela ibaiaren arrisku handieneko eremuak zaintzen jarraituko du, neurri egokiak hartu behar izanez gero.

Udalak prebentzio-neurrien berri eman ondotik, Gobela Ibaia elkarteko kideek ere uholde-arriskuko guneetatik ondasunak eta autoak kentzeko gomendatu diete auzokideei, hala nola Errotatxu, Salsidu, Fadura, Larrañazubi eta Neguri Langile aldeetan.

Jendartea Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun