Hirigintzako esku-hartzeakaz lotutako obren edota jardueren aurretiazko komunikazioak entrega daitezke gaurtik aurrera Getxoko herritarren arretarako bulegoetan (HAB). Arduradunek azaldu dutenez, komunikazioak honako esku-hartze hauei buruzkoak dira: eraikinetan barruko eta kanpoko obrak egitea; toldoak eta errotuluak jartzea; partzelak eta lursailak ixtea; obra-lizentziaren edota jardueraren titulartasun-aldaketa; eta gune pribatuetan, obratako garabiak edota karga-jasogailuak eta baliabide osagarriak (edukiontziak, etxolak eta abar) jartzea, zundaketak eta prospekzioak, eta garbiketa eta sastrakak kentzea, mantentze-lanak, lorategiak eta lurren zoladura eta mugimendua.
Horri buruzko informazio guztia “Hirigintza-lizentziei eta komunikatutako egintzei buruzko udal ordenantza”-n dago jasota. Orain arte, kudeaketa hori Santa Klarako udal-bulegoetan egiten zen, eta gaurtik, astelehenetik, aurrera HABetan bakarrik egin ahal izango da: astelehen, eguazten eta barikuetan Algortakoan (Torrene kalea 3) eta martitzen eta eguenetan Romo-Areetakoan (Las Mercedes kalea 13, Getxo Elkartegiaren ondoan), zerbitzuaren ohiko ordutegiaren barruan, hau da, 08:00etatik 14:00etara.
Hitzordua eskatu behar da aldez aurretik, orain arte egin den bezala, 010 (Call Center) / 944 660 000 telefonoetan (08:00etatik 19:00etara, astelehenetik barikura) edo https://citaprevia.getxo.eus helbidean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
