Hilabete barru itxiko dute Ramiro Pinilla Eleberri Laburren Lehiaketaren seigarren edizioan parte hartzeko deialdia

2021ko irabazleen talde argazkia. © GETXOKO UDALA

Lehiaketan parte ahal izango dute egoitza Espainiako Estatuan dutenek, edozein dela ere haien nazionalitatea. Euskaraz zein gaztelaniazko lanak aurkeztu ahal izango dira, eta horien luzera 80 eta 120 orrialde artekoa izango da. Testuak jasotzeko epea  otsailaren 20an amaituko da. Abuztuaren bigarren hamabostaldian epaimahaiak bere erabakia jakinaraziko du, eta sariak irailaren lehenengo hamabostaldian emango dituzte.

Getxoko Kultur Etxeak abiarazi du Ramiro Pinilla 6. Eleberri Laburren Lehiaketa, idazle ospetsuaren memoria mantendu eta literatura-sorkuntza bultzatzea helburu dituen ekimena, hain zuzen ere.  Bi sari emango dituzte lehiaketan, euskarazko eta gaztelaniazko lanentzat, horietako bakoitza 6.000 eurokoa. Halaber, lana argitaratzeko 1.000 euroko laguntza ere jasoko dute irabazleek. Deialdiaren arauak Getxoko Kultur Etxeetan zein www.getxo.eus/ramiropinilla eskura daitezke.

Ekimenaren bitartez, Pinillesca taldeak eta Getxoko Udalak aurreko beste proiektu batzuetan hasitako elkarlanagaz jarraitzen dute. Lehiaketaz baliatuta, egilea getxoztarra omendu gura dute, baita bere lana ere. Izan ere, bere liburuek sari ugari eta garrantzitsuak lortu dituzte, esaterako Nadal saria, Euskadi Literatura-saria gaztelaniaz eta Espainiako Narratibaren Sari Nazionala.

Txiki Baskardo lehiaketa

Eleberri laburren lehiaketaz gain, Txiki Baskardo Haur Kontakizunen 6. Lehiaketa abian jarri dute, DBHko 1. mailako Getxoko ikasleen artean literatura sorkuntza sustatzeko asmoz. Aurreko urtetan bezala, parte hartzeko bi modalitate egongo dira: ikastetxeen bitartez eta deialdi irekian. Kasu bietan finalean parte hartuko duten hautagaiak aukeratuko dituzte. Sari bat izango da hizkuntza bakoitzeko eta irabazleek tableta elektroniko bana jasoko dute.

Halaber, finalistei diploma bana emango zaie eta baita Getxoko edozein liburu-dendatan liburuak erosteko 50 euroko txeke bana ere. Deialdiko arauak eskura daude udal-webgunean: www.getxo.eus/txikibaskardo. Deialdi irekian parte hartzeko epea 2023ko otsailaren 20an bukatuko da.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun