Datorren urtarrilaren 31an, martitzenean, amaituko da Eman Minutu 1 ikus-entzunezko piezen nazioarteko lehiaketarako lanak aurkezteko epea. Aurten ere, UN Etxeak antolatu du ekimena, Getxoko Udalaren laguntzagaz eta, oraingoan, gaia "hitzak" da. Edizio honetan minutu bateko bideorik onenak sarituko dira, kultura- eta hizkuntza-aniztasunari buruz eta giza eskubideen sistemaren barruan kultura- eta hizkuntza-eskubideek duten lekuari buruz defendatzen, sustatzen, aldarrikatzen, zabaltzen eta/edo kontzientziatzen dutenak.
Gizarte Kohesioko zinegotzi Carmen Diazek nabarmendu duenez, “Udalaren laguntzagaz UN Etxeak antolatzen duen lehiaketa hau tresna bikaina da Giza Eskubideen, Berdintasunaren, justizia sozialaren eta pertsona guztientzako giza garapen duin baterako eskubidearen defentsaren garrantziaz komunitatean hausnartu ahal izateko. Hemendik animatzen ditugu Getxoko gazteak ikus-entzunezko nazioarteko lehiaketa honetan parte hartzera, aurten herrien hizkuntza ondarean arreta jarri nahi duena”.
Pertsona bakoitzak gura beste ikus-entzunezko lan aurkeztu ahal izango ditu, edozein hizkuntzatan eta honako formatu hautakoren batean: mov, avi, flv, mpeg edo mp4.
Interesatuek lehiaketaren baldintzak ezagutzeko www.dame1minutode.org webgunera jo dezakete.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
